"ايا استقلال بدنا نعيد؟"

ايلي بوموسى | 22 تشرين الثاني 2017 | 11:00

اسمحوا لي ان اتكلم بالعامية اللبنانية لان هذه الكلمات فقط للبنانيين. عندي سؤال زغير: مع مين بدنا نعيد؟ يمكن لازم نعيد الاستقلال مع مجرمين متل قتلة بشير الجميل، رينيه معوض، رفيق الحريري، بيار الجميل، جبران التويني، وهني لهالوقت بعدهم احرار؟ 


يمكن لازم نعيّد الاستقلال مع طارق يتيم وزملاءو المجرمين لعم يسرحوا ويمرحوا؟ يمكن لازم نعيّد الاستقلال مع تنظيم داعش وجبهة النصرة لقتلوا ولادنا ودبحوا اخواتنا وفلوا وصاروا احرار بسوريا.

كيف قلنا عين نعيد الاستقلال؟ كيف قلنا عين نعيد الاستقلال اذا بتلفون واحد بيضهروا المساجين المدانين من حبس رومية وبتم تهريبن الى سوريا بكل وقاحة. كيف قلنا عين نعيد الاستقلال اذا المجرم بتجارة حشيشة الكيف بينحكم بمؤبد اما تاجر متفجرات ويمكن الو يدية بكل الانفجارات يتحاكم بـ11 سنة. 


كيف قلنا عين نعيد الاستقلال اذا بعض المناطق اللبنانية ما بيسترجي الجيش يفوت ويعمل شغلو؟  كيف قلنا عين نعيد الاستقلال اذا الزعماء لعنا بعدن نفس العيل بس بيتغير الاسماء؟  عن ايا حريات بدكن نحكي؟

بدكن نحكي عن الحريات الاعلامية؟ أو عن الإعلاميين يلي عم ينطلبوا كل يوم من القضاء لأنهم قالوا كلمة حرة وصوت حق؟ بدكن نحكي عن الحريات الشخصية؟ أو عن الناس يلي عم تنقل بذريعة الدفاع عن الشرف او زمور او غيرو؟

وينا الحقوق؟ منحكي عن حقوق الانسان؟ وأقل شي بطالب فيه الانسان ببلاجنا ان يتحافظ ع كرامتو. منحكي عن حقوق المراة والاغتصاب ببلاد حق مشروع بقوانين مقنعة؟ منحكي عن حقوق الطفل وفي اطفال ما عندها بيت تنام في؟

وبيقلولك سيادة وطن... سيادة مين؟ اذا منخاف من قرار سعودي. سيادة مين؟ اذا مننطر التمويل من ايران. سيادة مين؟ اذا مننطر قررات دولية كرمال نعيش.



وبيقلولك شيل كل شي عجنب لبنان حلو. لبنان حلو من البحر عالجبل بـ 5 دقايق بس ما ننسى العجقة. لبنان حلو ببحرو بس ما ننسى التلوث. لبنان حلو بناسو بس لو ما كانو مسلحين وبشيل فردو وبقوصك. لبنان حلو بمشويرو بس انشالله الطريق ما تقتلك



إظهار التعليقات

يلفت موقع النهار الإلكتروني إلى أنّه ليس مسؤولًا عن التعليقات التي ترده ويأمل من القرّاء الكرام الحفاظ على احترام الأصول واللياقات في التعبير.